maiñ bhī kyā kartā ki is ko bevafā honā hī thā
zindagī ko ek din mujh se judā honā hī thā
har duā ko mere haq meñ bad-duā honā hī thā
ab kisī se kyā gila jo kuchh huā honā hī thā
apne be-ta.abīr ḳhvāboñ kī jalan kis se kahūñ
is gulābī shahr ko ātish-kada honā hī thā
phir bhī paanī kī mujhe qīmat adā karnī paḌī
mere lab par tishnagī kā zā.iqa honā hī thā
maut ke be-rahm hāthoñ ko bahāne kī talāsh
zindagī ke saath koī hādisa honā hī thā
maiñ bahut hassās huuñ is meñ kisī kā kyā qusūr
aa.ina ban kar mujhe sañg-āshnā honā hī thā
maiñ ne apne saare nāḳhun kaaT Daale the magar
zaḳhm ko 'ma.asūm' dobāra harā honā hī thā