ajab sī ik musībat ho ga.ī hai
mujhe tum se mohabbat ho ga.ī hai
qadam rakkhā hai jab se ishq-nagrī
hameñ rone kī aadat ho ga.ī hai
nahīñ suntā hai ye dil ab hamārī
ise ab terī aadat ho ga.ī hai
rihā.ī kab mile kis ko patā hai
so ab zindāñ se raġhbat ho ga.ī hai
nahīñ hai aap tak apnī rasā.ī
pahuñch se duur qīmat ho ga.ī hai
yahāñ ab jaan par mere banī hai
tumhārī bas sharārat ho ga.ī hai
suno gar sun sako ai jān-e-'chandā'
hameñ duniyā se nafrat ho ga.ī hai