zabāñ ko apnī gunahgār karne vaalā huuñ

ḳhamosh rah ke hī iz.hār karne vaalā huuñ

maiñ karne vaalā huuñ har ḳhair-ḳhvāh ko māyūs

abhī maiñ jurm kā iqrār karne vaalā huuñ

chhupānī chāhiye jo baat mujh ko duniyā se

usī kā aaj maiñ iz.hār karne vaalā huuñ

vo jis ke ba.ad mujhe kuchh nahīñ Darā.egā

vo inkishāf sar-e-dār karne vaalā huuñ

machī hai khalbalī aisī nazar ke āñgan meñ

ki jaise maiñ tirā dīdār karne vaalā huuñ

hayā ke rañg se gulzār ho gayā chehra

pata hai us ko ki maiñ pyaar karne vaalā huuñ