kiyā ġham ne sarāyat be-nihāyat
karūñ kis siiñ shikāyat be-nihāyat
hamāre qatl par muftī ne ġham ke
nikālā hai rivāyat be-nihāyat
tū apne ġhamza-e-ḳhūnīñ kī zālim
abas mat kar himāyat be-nihāyat
tire ruḳh par hujūm-e-ḳhāl-o-ḳhat na.iiñ
ki haiñ mus.haf meñ aayat be-nihāyat
kiyā hai ishq ke haadī ne mujh kuuñ
mohabbat kī hidāyat be-nihāyat
shakar-lab ne nigāh-e-dilbarī siiñ
kiyā mujh par ināyat be-nihāyat
'sirāj' ab dāstān-e-shauq bas kar
ki bejā hai hikāyat be-nihāyat