ye umr bhar kā safar hai isī sahāre par

ki vo khaḌā hai abhī dūsre kināre par

añdherā hijr kī vahshat kā raqs kartā hai

tamām raat mirī aañkh ke sitāre par

havā-e-shām tire saath ham bhī jhūmte haiñ

kisī ḳhayāl kisī rañg ke ishāre par

kisī kī yaad satā.e to jā ke rakh aanā

mahakte phuul kisī aabjū ke dhāre par

ufuq ke paar azal se ik aag raushan hai

ye saarā khel hai us aag ke sharāre par