lutf kī un se iltijā na kareñ

ham ne aisā kabhī kiyā na kareñ

mil rahegā jo un se milnā hai

lab ko sharminda-e-duā na kareñ

sabr mushkil hai aarzū bekār

kyā kareñ āshiqī meñ kyā na kareñ

maslak-e-ishq meñ hai fikr harām

dil ko tadbīr-āshnā na kareñ

bhuul hī jaa.eñ ham ko ye to na ho

log mere liye duā na kareñ

marzi-e-yār ke ḳhilāf na ho

kaun kahtā hai vo jafā na kareñ

shauq un kā so miT chukā 'hasrat'

kyā kareñ ham agar vafā na kareñ