rog dil ko lagā ga.iiñ āñkheñ

ik tamāshā dikhā ga.iiñ āñkheñ

mil ke un kī nigāh-e-jādū se

dil ko hairāñ banā ga.iiñ āñkheñ

mujh ko dikhlā ke rāh-e-kūcha-yār

kis ġhazab meñ phañsā ga.iiñ āñkheñ

us ne dekhā thā kis nazar se mujhe

dil meñ goyā samā ga.iiñ āñkheñ

mahfil-e-yār meñ ba-zauq-e-nigāh

lutf kyā kyā uThā ga.iiñ āñkheñ

haal sunte vo kyā mirā 'hasrat'

vo to kahiye sunā ga.iiñ āñkheñ