jānāñ pe jī nisār huā kyā bajā huā
us raah meñ ġhubār huā kyā bajā huā
muddat se rāz-e-ishq mire pe ayaañ na thā
ye bhed āshkār huā kyā bajā huā
taaze khile haiñ daaġh ke gul dil ke baaġh meñ
phir mausam-e-bahār huā kyā bajā huā
dil tujh parī kī aag meñ sīmāb kī misāl
āḳhir kuuñ be-qarār huā kyā bajā huā
kishvar meñ dil ke thā amal-e-sūbādār-e-aish
ab ġham kā iḳhtiyār huā kyā bajā huā
āhū-e-dil ki vahshi-e-sahrā-e-aql thā
tujh zulf kā shikār huā kyā bajā huā
vo āftāb aaj mire qatl par 'sirāj'
shab-dez par savār huā kyā bajā huā