ajiib taur kī hai ab ke sargirānī mirī
maiñ tujh ko yaad bhī kar luuñ to mehrbānī mirī
maiñ apne aap meñ gahrā utar gayā shāyad
mire safar se alag ho ga.ī ravānī mirī
bas ek moḌ mirī zindagī meñ aayā thā
phir is ke ba.ad ulajhtī ga.ī kahānī mirī
tabāh ho ke bhī rahtā hai dil ko dhaḌkā sā
ki rā.egāñ na chalī jaa.e rā.egānī mirī
maiñ apne ba.ad bahut yaad aayā kartā huuñ
tum apne paas na rakhnā koī nishānī mirī