sadā-e-zāt ke ūñche hisār meñ gum hai
vo ḳhāmushī kā musāfir pukār meñ gum hai
vo shahr-e-shab ke kināre charāġh jaltā hai
ki koī sub.h mire intizār meñ gum hai
ye kah rahī haiñ kisī kī jhukī jhukī āñkheñ
badan kī aañch nazar ke ḳhumār meñ gum hai
har ek samt se us ko sadā.eñ aatī haiñ
mujhe pukār ke ḳhud bhī pukār meñ gum hai
na.e charāġh jalā mujh ko DhūñDne vaale
tirī nazar to nazar ke ġhubār meñ gum hai