ab mohabbat na fasāna na fusūñ hai yuuñ hai
sāhab-e-dasht to kahtā thā ki yuuñ hai yuuñ hai
pas-e-girya koī detā hai tasallī tujh ko
ye jo ai dil tujhe be-vaj.h sukūñ hai yuuñ hai
'mīr'-sāhib hī nahīñ us se pare baiThte haiñ
jo bhī shā.ista-e-ādāb-e-junūñ hai yuuñ hai
zindagī-bhar meñ koī sher to aisā hotā
maiñ bhī kahtā jo mirā zaḳhm-e-darūñ hai yuuñ hai
niist meñ hast kā ehsās dilātī huī aañkh
shor kartī hai ki hai kun-fayakūñ hai yuuñ hai