kūcha-e-yār meñ ab jaane guzar ho ki na ho

vahī vahshat vahī saudā vahī sar ho ki na ho

jaane ik rañg sā ab ruḳh pe tire aa.e na aa.e

nafas-e-shauq se gul shola-e-tar ho ki na ho

ab musalsal bhī jo dhaḌke dil-e-nāshād mirā

kis ko mālūm tire dil ko ḳhabar ho ki na ho

qahr meñ lutf meñ mad-hoshī o hushyārī meñ

vo mire vāste taḳhsīs-e-nazar ho ki na ho

hijr kī raat thī imkān-e-sahar se raushan

jaane ab us meñ vo imkān-e-sahar ho ki na ho