baat kar dil satī hijāb nikāl
ġhuncha-e-lab satī gulāb nikāl
shab-e-hijrāñ kī tīrgī kar duur
husn-e-tābāñ kā āftāb nikāl
bait-e-abrū kā dars de mujh kuuñ
fard-e-dīvān-e-intiḳhāb nikāl
bul-havas band-e-uqda-e-ġham hai
zulf-e-mushkīñ siiñ pech-o-tāb nikāl
munhasir nahīñ hai gosha-gīrī par
dil siiñ yaksū ho sab hisāb nikāl
takiya-e-maḳhmalī sirhāne rakh
lekin āñkhoñ siiñ apnī ḳhvāb nikāl
mastī-e-ishq gar tujhe hai 'sirāj'
shīsha-e-chashm siiñ sharāb nikāl