ishq ne ḳhuuñ kiyā hai dil jis kā

pāra-e-la.al ashk hai tis kā

yaad kar kar amal meñ laatā huuñ

har suḳhan ishq ke mudarris kā

chashm-e-sāqī kā vasf likhtā huuñ

le qalam haat shāḳh-e-nargis kā

ġham ne piilā kiyā hamārā rañg

kīmiyā-gar ne zar kiyā mis kā

zulf dikhlā ke dil lapeT liyā

ab pareshāñ hai haal majlis kā

tum ne paa.e ho husn kī daulat

pūchhte kab ho haal muflis kā

be-kasī mujh siiñ āshnā hai 'sirāj'

nahīñ to aalam meñ kaun hai kis kā