darpai-e-umr-e-rafta huuñ yārab

har-dam az-ḳhud guzishta huuñ yārab

kyā huuñ maqbūl-e-tab-e-ahl-e-suḳhan

ek mazmūn-e-basta huuñ yārab

kyā dikhā.ūñ maiñ apne jauhar aah

shakl-e-teġh-e-shikasta huuñ yārab

apnī kam-fursatī kahūñ kyā aah!

aah az-sīna jasta huuñ yārab

paanī paanī huuñ jis ko dekh jahīm

soz-e-ġham se vo tafta huuñ yārab

dekho kyā ho ki vaañ hai nāz-e-ġhurūr

maiñ ye ahvāl-e-ḳhasta huuñ yārab