yaad aatā hai to kyā phirtā huuñ ghabrāyā huā
champa.ī rañg us kā aur jauban vo gadrāyā huā
baat hī avval to vo kartā nahīñ mujh se kabhī
aur jo bole hai kuchh muñh se to sharmāyā huā
jā ke phir aa.uuñ na jā.ūñ us galī meñ dauḌ dauḌ
par karūñ kyā maiñ nahiñ phirtā hai dal aayā huā
be-sabab jo mujh se hai vo shola-ḳhū sargarm-e-jañg
maiñ to hairāñ huuñ ki ye kis kā hai bhaḌkāyā huā
vo kare azm-e-safar to kījiye duniyā se kuuch
ye irāda ham ne bhī dil meñ hai Thahrāyā huā
nok-e-mizhgāñ par dil-e-pazh-murda hai yuuñ sar-nigūñ
shāḳh se jhuk aa.e hai juuñ phuul murjhāyā huā
jā.ūñ jā.ūñ kyā lagāyā hai miyāñ baiThe raho
huuñ maiñ apnī ziist se aage hī uktāyā huā
terī duurī se ye hālat ho ga.ī apnī ki aah
an-qarīb-e-marg har ik apnā ham-sāya huā
kyā kaheñ ab ishq kyā kyā ham se kartā hai sulūk
dil pe be-tābī kā ik pyāda hai biThlāyā huā
hai qalaq se dil kī ye hālat mirī ab tū ki maiñ
chār-sū phirtā huuñ apne ghar meñ ghabrāyā huā
chupke chupke apne apne dil meñ sab kahte haiñ log
kyā balā vahshat huī hai is ko yā saayā huā
hukm bār-e-majlis ab 'jur.at' ko bhī ho jaa.e jī
ye bichāra kab se darvāze pe hai aayā huā