bin tire kyā kaheñ kyā rog hameñ yaar lagā
Dar lage naam liye jis kā vo āzār lagā
sab ye kahte haiñ mujhe tujh se jo dil yaar lagā
haa.e kyā is ko javānī meñ ye āzār lagā
ham divānoñ kā ye hai dasht-e-junūñ meñ rutba
ki qadam rakhte hī aa paañv se har ḳhaar lagā
kahiye kyūñkar na use bādshah-e-kishvar-e-husn
ki jahāñ jā ke vo baiThā vahīñ darbār lagā
qadr phir apnī ho kyā us ke ḳharīdāroñ meñ
roz-o-shab jis kī galī meñ rahe bāzār lagā
kaun sā din vo kaTā mujh pe ki ai teġh-e-firāq
zaḳhm ik taaza mire dil pe na har baar lagā
dil meñ ab us ke jo lahr aa.ī hai ghar jaane kī
tū bhī rone kī jhaḌī dīda-e-ḳhūñ-bār lagā
muttasil tū jo mirā ḳhūn-e-jigar piitā hai
kyuuñ ġham-e-ishq ye kyā tujh ko mazedār lagā
tez-dastī-e-junūñ aaj hai aisī hī ki bas
na rahā apne garebāñ meñ koī taar lagā
is zamīñ meñ ġhazal ik aur bhī paḌh ai 'jur.at'
ḳhuub andāz ke ab kahne tū ash.ār lagā