āñkhoñ meñ to aañsū ko sukūñ tak nahīñ miltā

dāman pe jab aatā hai to hotā hai ravāñ aur

ai quvvat-e-parvāz zarā aur sahārā

sunte haiñ sitāroñ meñ haiñ ābād jahāñ aur

gahrā ho agar sajda to khiñch aate haiñ jalve

peshānī-e-ālam pe ubhartā hai nishāñ aur

taqsīm agar hotā hai sho.aloñ meñ nasheman

jalte hue tinkoñ se lipaTtā hai dhuāñ aur

ho rañg pe mahfil to badaltī haiñ fazā.eñ

ai 'fazl' sañvar jaatā hai andāz-e-bayāñ aur