vasl kī to kabhī furqat kī ġhazal likhte haiñ
ham to shā.ir haiñ mohabbat kī ġhazal likhte haiñ
paḌhiye un ko kisī kāġhaz pe nahīñ sarhad par
apne ḳhuuñ se jo shahādat kī ġhazal likhte haiñ
rahnumā apne vatan ke bhī haiñ kitne shātir
vo shahādat pe siyāsat kī ġhazal likhte haiñ
tum ne mazdūr ke chhāle nahīñ dekhe shāyad
apne hāthoñ pe vo mehnat kī ġhazal likhte haiñ
mulk aise bhī haiñ kuchh ḳhaas paḌosī apne
sarhadoñ pe jo adāvat kī ġhazal likhte haiñ
ham sabhī chain se sote haiñ magar rātoñ meñ
fauj vaale to hifāzat kī ġhazal likhte haiñ
shauq likhne kā bahut ham ko bhī hai lekin ham
sone ke pen se ġhurbat kī ġhazal likhte haiñ