jalva-e-jāñ-fazā dikhātā rah
dil-e-be-jān kuuñ jalātā rah
dil hamārā ġharīb-ḳhāna hai
gaah gaah is taraf bhī aatā rah
ḳhushk hote haiñ dam-ba-dam lab-e-zaḳhm
aab shamshīr kā pilātā rah
ishq aatā hai fauj-e-ġham le kar
tujh kuuñ kahtā huuñ hosh, jaatā rah
taaki ḳhush hove gul-badan bulbul
akasr apnī ġhazal sunātā rah
mansab-e-ishq hai agar tujh kuuñ
naubat-e-āh kuuñ bajātā rah
sham.a-rū siiñ 'sirāj' jā kar bol
ki patiñgoñ kuuñ mat jalātā rah