makāñ bechā nahīñ maiñ ne guzārā chal rahā hai
nadī apnī jagah par hai kinārā chal rahā hai
ibādat meñ abhī mashġhūl haiñ in ko na chheḌo
vafā kis se kareñge istiḳhāra chal rahā hai
maiñ ḳhud parvāz se apnī pareshāñ āj-kal huuñ
zamāna hai zamīñ par aur bichāra chal rahā hai
na samjhāo mujhe yuuñ hiir aur rāñjhe kā chakkar
vahī hai naañ jo barsoñ se hamārā chal rahā hai
abhī kuchh der pahle jis ko raazī kar liyā thā
'naved' us se mirā jhagḌā dobāra chal rahā hai