savād-e-hijr meñ rakkhā huā diyā huuñ maiñ
tujhe ḳhabar nahīñ kis aag meñ jalā huuñ maiñ
maiñ qarya qarya phirā gard-bād ban ke jahāñ
usī zamīn pe parcham-sifat uThā huuñ maiñ
abhī chhuTī nahīñ jannat kī dhuul paañv se
hanūz farsh-e-zamīñ par nayā nayā huuñ maiñ
hazār shukr hai ki ḳhud pe ustuvār thā maiñ
hazār shukr ki buniyād par girā huuñ maiñ
mirī shaguft ke mausam abhī nahīñ aa.e
kahīñ kahīñ pe magar phir bhī khil gayā huuñ maiñ
mirī shikast bhī hai reḳht 'iftiḳhār-muġhal'
ki yūñhī banñe bigaḌne meñ hī banā huuñ maiñ