maiñ bhī be-ant huuñ aur tū bhī hai gahrā sahrā
yā Thahar mujh meñ yā ḳhud meñ mujhe Thahrā sahrā
ruuh meñ lahr banāte haiñ tirī lahroñ se
aur kuchh der mire sāmne lahrā sahrā
aañkh jhapkī thī bas ik lamhe ko aur is ke ba.ad
maiñ ne DhūñDā hai tujhe zindagī sahrā sahrā
apnī hastī ko bikharne se bachā lenā tum
mujh pe mat jaanā mirī jaan maiñ Thahrā sahrā
mere lahje kā samundar hī nahīñ sūkhā hai
luT gayā terī hañsī kā bhī sunahrā sahrā