bas vahī vo dikhā.ī dete haiñ

ek ke do dikhā.ī dete haiñ

jitne harjā.ī ham ne dekhe haiñ

utne kis ko dikhā.ī dete haiñ

vo yahāñ haiñ nahīñ pata hai hameñ

phir bhī ham ko dikhā.ī dete haiñ

dil ko bahlānā hī to maqsad hai

farz kar lo dikhā.ī dete haiñ

jaise ham tum ko saaf dekhte haiñ

vaise tum ko dikhā.ī dete haiñ

tāb-e-nazzāra baaqī hai ki ga.ī

aur dekho dikhā.ī dete haiñ

jo zamāne ko dekhte bhī nahīñ

vo unhīñ ko dikhā.ī dete haiñ

sher paḌhte haiñ aap jab 'vāsif'

dāstāñ-go dikhā.ī dete haiñ