har ek pe ye raaz bhī ifshā nahīñ hotā

achchhā jo nazar aatā hai achchhā nahīñ hotā

rote ho bhalā kis liye jab jānte ho tum

ye ishq hai is ishq meñ kyā kyā nahīñ hotā

ummīd ravā rakhte ho har ek se kyūñkar

har shaḳhs zamāne meñ masīhā nahīñ hotā

kartā hai jo har baat pe sachchā.ī kā da.avā

sach baat to ye hai ki vo sachchā nahīñ hotā

yādoñ ke shabistān meñ baiThā huā saa.il

tanhā jo nazar aatā hai tanhā nahīñ hotā