duā.eñ kījiye ġhunchoñ ke muskurāne kī

abhī umiid hai baaqī bahār aane kī

maiñ jin kā dil meñ tasavvur sajā.e rakhtā huuñ

koī to raah mile un tak aane jaane kī

talāsh ḳhud hī maiñ kar lūñgā aap ke ghar ko

na dūñgā aap ko zahmat maiñ ghar pe aane kī

baġhair us ke mujhe niiñd kaise aa.egī

duā.eñ dete ho tum kyuuñ mujhe sulāne kī

vo naġhme sañg ko bhī kar deñ mom jo 'sāhil'

hameñ to aaj bhī aadat hai gungunāne kī