dard meñ shiddat-e-ehsās nahīñ thī pahle

zindagī raam kā ban-bās nahīñ thī pahle

ham bhī sau jaate the ma.asūm farishtoñ kī tarah

aur ye raat bhī hassās nahīñ thī pahle

ham ne is baar tujhe jism se haT kar sochā

shā.irī ruuh kī akkās nahīñ thī pahle

terī furqat hī udāsī kā sabab hai ab ke

terī qurbat bhī hameñ raas nahīñ thī pahle

terī āñkhoñ ne kahīñ kā nahīñ rakhā ham ko

itnī shiddat kī hameñ pyaas nahīñ thī pahle

raah chalte hue ham muḌ ke nahīñ dekhte the

rāste meñ tirī bū-bās nahīñ thī pahle