bosīda jism-o-jāñ kī qabā.eñ liye hue
sahrā meñ phir rahā huuñ balā.eñ liye hue
dil vo ajiib shahr ki jis kī fasīl par
nāzil huā hai ishq balā.eñ liye hue
maiñ vahshat-e-junūñ huuñ mirī musht-e-ḳhāk ko
phirtī haiñ dar-ba-dar ye havā.eñ liye hue
dekhā baġhaur apnī ḳhudī kā jo aa.ina
ubhre hazār chehre ḳhatā.eñ liye hue
ik shor gūñjtā hai musalsal ḳhalāoñ meñ
hai lafz-e-kun bhī kitnī sadā.eñ liye hue