jab kabhī nām-e-mohamād lab pe mere aa.e hai
lab se lab milte haiñ jaise dil se dil mil jaa.e hai
jab koī ġhuncha chaman kā bin khile murjhā.e hai
kyā kaheñ kyā kyā chaman vāloñ ko ronā aa.e hai
koī kah detā ki ab kaahe ko qāsid aa.e hai
zo.af se bīmār ko uTThā na baiThā jaa.e hai
ho na ho kuchh baat hai tab jī mirā ghabrā.e hai
aap aa.e haiñ na ḳhat hī bhej kar bulvā.e hai
raat bhī rote kaTī hai din bhī guzrā jaa.e hai
aane vaale kuchh nahīñ ma.alūm kab se aa.e hai
tere dīvāne pe aisī bhī ghaḌī aa jaa.e hai
dam-ba-ḳhud rah jaa.e hai sochā na samjhā jaa.e hai
ek din vo din the rone pe hañsā karte the ham
ek ye din haiñ ki ab hañsne pe ronā aa.e hai
barq ko kyā jaane kyā zid hai nasheman se mire
chaar tinkoñ kī qasam vo bhī na dekhā jaa.e hai
hijr kī rātoñ meñ bhī tanhā kahāñ rahtā hai zehn
tum kabhī aa jaao ho, dushman kabhī aa jaa.e hai
jī meñ rakhte haiñ kaheñ bhī to kisī se kyā kaheñ
shikva un kā yuuñ to lab par baar baar aa jaa.e hai
bigḌī ban jaatī hai, ye sach hai magar ai ham-nashīñ
nā-murādī kā burā ho, jī hī baiThā jaa.e hai
ik ġhalat sajde se kyā hotā hai vaa.iz kuchh na pūchh
umr bhar kī sab riyāzat ḳhaak meñ mil jaa.e hai
aap kī ik zulf suljhāne ko lākhoñ haath haiñ
merī gutthī bhī koī aa kar kabhī suljhā.e hai