ruḳh pe gesū jo bikhar jā.eñge
ham añdhere meñ kidhar jā.eñge
apne shāne pe na zulfeñ chhoḌo
dil ke shīrāze bikhar jā.eñge
yaar aayā na agar va.ade par
ham to be-maut ke mar jā.eñge
apne hāthoñ se pilā de saaqī
riñd ik ghūñT meñ tar jā.eñge
qāfile vaqt ke rafta rafta
kisī manzil pe Thahar jā.eñge
muskurāne kī zarūrat kyā hai
marne vaale yūñhī mar jā.eñge
ho na māyūs ḳhudā se 'bismil'
ye bure din bhī guzar jā.eñge