muztarib aap ke binā hai jī
ye mohabbat bhī kyā balā hai jī
jī rahā huuñ maiñ kitnā ghuT ghuT kar
ye mirā jī hī jāntā hai jī
mere siine meñ jo dhaḌaktā hai
merā dil hai ki aap kā hai jī
aap is ko burā samajhte haiñ
apnā apnā mushāhida hai jī
itne ma.asūm aap mat baniye
aap logoñ ko sab patā hai jī
kyā batā.ūñ ki kitnī shiddat se
tum se milne ko chāhtā hai jī
chand yādeñ haiñ chand sapne haiñ
apne hisse meñ aur kyā hai jī
ahl-e-furqat kī zindagī 'rāġhib'
zindagī hai ki ik sazā hai jī