dukh uThāo kitne hī ghar bahār karne meñ
ek pal nahīñ lagtā phuul sab bikharne meñ
zindagī ho kaisī bhī us se jī nahīñ bhartā
varna sirf hotā hai kitnā vaqt marne meñ
khiḌkiyāñ huiiñ ḳhālī phūloñ aur charāġhoñ se
kaisā dil taḌaptā hai shahr se guzarne meñ
vaqt zaḳhm bhartā hai aur yuuñ bhī hotā hai
umr biit jaatī hai ek zaḳhm bharne meñ
sab kī baat dohrānā yuuñ to rasm-e-duniyā hai
lutf aur hai lekin apnī baat karne meñ
jā basī hai vo laḌkī shahr meñ magar ab bhī
gūñjte haiñ giit us ke har pahāḌī jharne meñ