hamārī samt haiñ saare Dhalāv

paḌā har sail kā ham par dabāv

mile haiñ sāda-lauhī kī sazā meñ

luTere nāḳhudā kāġhaz kī naav

vahāñ bhī vahshateñ tanhā.iyāñ haiñ

zarā sahrā se vāpas ghar to jaao

na jaane kab ye aag aa jaa.e bāhar

ki sīnoñ meñ dahakte haiñ alaav

havā kā jis taraf ruḳh ho gayā hai

usī jānib hai shāḳhoñ kā jhukāo

zamīñ kyā āsmāñ bhī muntazir hai

hisār-e-zāt se bāhar to aao

kaheñge log 'ahsan' tum ko pāgal

mohabbat hai to ye tohmat uThāo