jānib-e-dasht kabhī tum bhī nikal kar dekho

dosto ābla-pā.ī kā amal kar dekho

merī āshufta-sarī par na hañso ai logo

ishq kī aag meñ ḳhud bhī zarā jal kar dekho

tum jo chāho to mire dil ko sukūñ mil jaa.e

apnā andāz-e-nazar kuchh to badal kar dekho

maiñ tumheñ jiine ke andāz sikhā saktā huuñ

ek do gaam mere saath to chal kar dekho

chāñdnī-rātoñ meñ phirtā hai koī āvāra

tum ko fursat jo mile ghar se nikal kar dekho

fāsle barsoñ ke pal-bhar meñ simaT ā.eñge

aaj kī shab mire pahlū meñ machal kar dekho

us kā chehra hai kisī dasht kā sūraj 'nāsir'

us kī jānib kabhī dekho to sambhal kar dekho