mile vo dars mujh ko zindagī se
ki ab Darne lagā dil dostī se
ḳhirad hai āḳhirī manzil junūñ kī
pareshāñ kyuuñ ho merī āgahī se
tum aa.e bhī to ġham ko saath laa.e
mire aañsū nikal aa.e ḳhushī se
ḳhud apnā naam le kar kostā huuñ
ḳhudī ġhāfil nahīñ hai be-ḳhudī se
ye maanā maut bhī āsāñ nahīñ hai
magar mushkil nahīñ hai zindagī se
zamāna dars hāsil kar rahā hai
tumhārī aur hamārī zindagī se
uchaTtī sī nazar 'iqbāl' un kī
koī miltā ho jaise ajnabī se