kal raat dil meñ yādoñ kā mela lagā rahā
maazī ko chashm-e-hāl se maiñ dekhtā rahā
tere baġhair jī to na sakte the ham magar
ġham terā zindagī kā sahārā banā rahā
muñh meñ zabāñ na rakhte the terī galī ke log
maiñ pattharoñ se terā patā pūchhtā rahā
zindān-e-ehtiyāt meñ guzrī tamām umr
maiñ jurm-e-āgahī kī sazā kāTtā rahā
shal ho gayā vajūd to 'ābid' khulā ye bhed
maiñ jis ko DhūñDhtā thā vo mujh maiñ chhupā rahā