Sadique Indori

ek ek lamha mujhe zist se be-zari hai

Sadique Indori

ek ik lamha mujhe ziist se be-zārī hai

merī har saañs sulagtī huī chiñgārī hai

kyā aurāq musavvar haiñ kitāb-e-dil ke

ḳhūn-e-armāñ se har ik safhe pe gul-kārī hai

zaḳhm zaḳhm haiñ āñkhoñ se lagā kar dil tak

soch meñ huuñ ki ye kis qism dildārī hai

ye simaTte hue saa.e ye larazte dar-o-bām

ik na.ī sub.h ke elaan tayyārī hai

har qadam par nazar aate haiñ salīboñ ke sutūn

ye koī ḳhvāb hai ālam-e-bedārī hai

kyuuñ uTheñ paañv junūñ ke sū-e-manzil 'sādiq'

ek ik gaam salāsil girāñ-bārī hai

Top Urdushayar.com