koī bhī chiiz yahāñ vaqt-e-zarūrat na milī

kabhī sahrā jo milā bhī kahīñ vahshat na milī

band kamre meñ ye dastūr kahāñ se aayā

kyuuñ mujhe ḳhud se bhī milne kī ijāzat na milī

kyuuñ har ek moḌ pe rokā hai talāshī ke liye

kyuuñ mujhe ghar se nikalne kī ijāzat na milī

ab yahī rañj mirī aañkh meñ aa baiThā hai

toḌ kar aa.ina dekhā kahīñ hairat na milī

mauj-e-dariyā thī kahīñ aur na havā kā jhoñkā

ret par likkhī thī jo raat ibārat na milī