qismat ajiib khel dikhātī chalī ga.ī

jo hañs rahe the un ko rulātī chalī ga.ī

dil goyā hādsāt-e-musalsal kā shahar ho

dhaḌkan bhī chīḳh ban ke Darātī chalī ga.ī

kāġhaz kī tarah ho ga.ī bosīda zindagī

tahrīr hasratoñ kī miTātī chalī ga.ī

maiñ chāhtī nahīñ thī magar phir bhī jaane kyuuñ

aa.ī jo terī yaad to aatī chalī ga.ī

āñkhoñ kī putliyoñ se tirā aks bhī gayā

ya.anī charāġh meñ thī jo baatī chalī ga.ī

DhūñDā unheñ jo raat kī tanhā.ī meñ 'hayā'

ik kahkashāñ sī zehan pe chhātī chalī ga.ī