ishq kyā hai bebasī hai bebasī kī baat kar
ye bhī koī zindagī hai zindagī kī baat kar
karb se TuuTā nahīñ maiñ dard se martā nahīñ
mujh pe taarī be-hisī hai be-hisī kī baat kar
vaqt se laḌtā huā taqdīr se uljhā huā
maiñ nahīñ huuñ sar-kashī hai sar-kashī kī baat kar
tū ḳhudā jis ko banāne par ba-zid hai nā-samajh
vo faqat ik aadmī hai aadmī kī baat kar
vaqt kab kā mar chukā hai aaj bhī zinda huuñ maiñ
tū nahīñ to kyā kamī hai is kamī kī baat kar
fā.elātun fā.elun se ham bhī vāqif haiñ magar
ye hamārī shā.irī hai shā.irī kī baat kar