ishq se maiñ Dar chukā thā Dar chukā to tum mile
dil to kab kā mar chukā thā mar chukā to tum mile
jab maiñ tanhā ghaT rahā thā tab kahāñ thī zindagī
dil bhī ġham se bhar chukā thā bhar chukā to tum mile
be-qarārī phir mohabbat phir se dhoka ab nahīñ
faisla maiñ kar chukā thā kar chukā to tum mile
maiñ to samjhā sab se baḌh kar matlabī thā maiñ yahāñ
ḳhud pe tohmat dhar chukā thā dhar chukā to tum mile