kyā aaj un se apnī mulāqāt ho ga.ī
sahrā pe jaise TuuT ke barsāt ho ga.ī
vīrān bastiyoñ meñ mirā din huā tamām
sunsān jañgaloñ meñ mujhe raat ho ga.ī
kartī hai yuuñ bhī baat mohabbat kabhī kabhī
nazreñ milīñ na hoñT hile baat ho ga.ī
zālim zamāna ham ko agar de gayā shikast
baazī mohabbatoñ kī agar maat ho ga.ī
ham ko nigal sakeñ ye añdheroñ meñ dam kahāñ
jab chāñdnī se apnī mulāqāt ho ga.ī
bāzār jaanā aaj saphal ho gayā mirā
barsoñ ke ba.ad un se mulāqāt ho ga.ī