ziist meñ ġham haiñ ham-safar phir bhī
tā-ajal karnā hai basar phir bhī
TūTī-phūTī huuñ chāhe dīvāreñ
apnā ghar to hai apnā ghar phir bhī
chāhe inkār ham kareñ sach kā
hove hai zehn par asar phir bhī
dil machaltā hai un se milne ko
ham churāte rahe nazar phir bhī
hai yaqīñ tum hameñ na bhūloge
ik zamāna gayā guzar phir bhī
haiñ ye alfāz dil lubhāne ke
kaash shāyad yūñhī magar phir bhī