ye jo har lamha mirī saañs hai aatī jaatī

ek tūfān hai siine meñ uThātī jaatī

maujeñ uTh uTh ke tah-e-āb chalī jaatī haiñ

haañ magar kis kī hai tasvīr banātī jaatī

ye shajar jis ke sabab raqs hai kartā rahtā

kaash vo bād-e-sabā dil ko nachātī jaatī

bas vahī qīmtī ik shai jo mirā hāsil thī

har ghaḌī paas hī rahtī na yuuñ aatī jaatī

kam se kam sañg-e-sar-e-rāh to hotā 'kausar'

aur duniyā mujhe Thokar bhī lagātī jaatī