imārat kā koī nashsha nahīñ thā
anā ke ghar se jab niklā nahīñ thā
mujhe to yaad hī aatā nahīñ hai
koī lamha ki jab taḌpā nahīñ thā
maiñ sab ke vāste achchhā thā lekin
usī ke vāste achchhā nahīñ thā
magar tashbīh us ko kis se dete
abhī to chāñd bhī niklā nahīñ thā
ajab ayyām-e-shauq-e-dīd guzre
kabhī rātoñ ko maiñ sotā nahīñ thā
hamāre ḳhvāb meñ saa.e ka.ī the
kisī ke dosh par chehra nahīñ thā
khulī jo aañkh to dekhā ye maiñ ne
abhī to hashr hī barpā nahīñ thā