hai vafā tujh meñ to pāband-e-vafā huuñ maiñ bhī

mujh se mil baiTh mohabbat kī fazā huuñ maiñ bhī

jab bhī aa jaa.e ḳhayāl un ko dil-e-muztar kā

lab pe be-sāḳhta aa.e vo duā huuñ maiñ bhī

ham-safar ban ke mile yā bane rahbar apnā

koī to pūchhe ki manzil kā patā huuñ maiñ bhī

guuñj sī ban ke fazāoñ meñ jo ho jaatī hai gum

mujh ko lagtā hai ki sahrā kī sadā huuñ maiñ bhī

maiñ ne chāhā hai dil-o-jāñ se 'sabīha' jis ko

vo kabhī aa.e kahe tujh pe fidā huuñ maiñ bhī