parinde sahme sahme uḌ rahe haiñ
barābar meñ farishte uḌ rahe haiñ
ḳhushī se kab ye tinke uḌ rahe haiñ
havā ke Dar ke maare uḌ rahe haiñ
kahīñ koī kamāñ taane hue hai
kabūtar āḌe-tirchhe uḌ rahe haiñ
tumhārā ḳhat havā meñ uḌ rahā hai
ta.āqub meñ lifāfe uḌ rahe haiñ
bahut kahtī rahī āñdhī se chiḌiyā
ki pahlī baar bachche uḌ rahe haiñ
shajar ke sabz pattoñ kī havā se
fazā meñ ḳhushk patte uḌ rahe haiñ