ajiib huuñ ki mohabbat shanās ho kar bhī
udaas lagtā nahīñ huuñ udaas ho kar bhī
ḳhudā kī tarah koī aadmī bhī hai shāyad
nazar jo aatā nahīñ ās-pās ho kar bhī
numū kī raushnī le kar ugā huuñ sahrā meñ
maiñ sabz ho nahīñ saktā huuñ ghaas ho kar bhī
vajūd vahm banā miT gayā magar phir bhī
tumhāre paas nahīñ huuñ qayās ho kar bhī
ye aadmī pe hukūmat tumheñ mubārak ho
faqīr kaise chhupe ḳhush-libās ho kar bhī