na to ham bahr se vāqif na suḳhan jānte haiñ

kaise deñ lafzoñ ko tartīb ye fan jānte haiñ

vo kisī taur bhī tujh ko na lagā.eñge gale

ai ḳhushī jo bhī tirā chāl-chalan jānte haiñ

dil ke mandir meñ haiñ do ek pujārī aise

jo na puujā na ibādat na bhajan jānte haiñ

is liye thaam ke rakkhā hai junūñ kā dāman

ai ḳhirad ham tirā dīvāliya-pan jānte haiñ

jo mohabbat ke haiñ alfāz mire hoñToñ par

vo ta.assub kā tire chīr-haran jānte haiñ

paañv phailāte haiñ itnā ki hai jitnī chādar

apnī auqāt hai kyā ḳhuub apan jānte haiñ