milī raah vo ki farār kā na pata chalā
uḌā sañg se to sharār kā na pata chalā
jo khiñche khiñche mujhe lag rahe the yahāñ vahāñ
kisī ek aise hisār kā na pata chalā
rahā jaate jaate na dekh sakne kā ġham hameñ
vo ġhubār uThā ki savār kā na pata chalā
rahī hijr meñ jo ik ek pal kī ḳhabar mujhe
to visāl meñ shab-e-tār kā na pata chalā
ka.ī mausamoñ se talāsh meñ hai mirī nazar
kisī gulsitāñ se bahār kā na pata chalā